O Concello de Ferrol vai celebrar o segundo Festival
Ilustrado de Ferrol os días 8 e 9 de xullo na Praza de Amboage aínda que inicialmente
estaba previsto no Cantón de Molíns. Será unha cita coa que a cidade poñerá en valor o
estilo de vida do século XVIII e regresará durante a tarde do venres e o día enteiro do
sábado aos anos máis gloriosos da cidade, tal e como indicou a concelleira de
Patrimonio Histórico, Eva Martínez Montero.
Un dos obxectivos do festival é “despertar entre os ferroláns o orgullo polo Ferrol
da Ilustración”, indicou, ao tempo que “atraer a turistas e visitantes doutros lugares para
que coñezan o noso patrimonio”. Esta segunda edición centrarase no baile ilustrado, que
durante dous días se divulgará cun nutrido programa de actividades de balde dirixidas a
todos os públicos, a maioría na Praza de Amboage. Haberá siluetas ilustradas para
facerse fotografías, pasarrúas, música, visitas guiadas para descubrir o Ferrol da Ilustración, bailes, sorteos de agasallos, produtos e descontos nos espazos ilustrados da
cidade, degustacións, escenas ilustradas na rúa, espectáculos infantís, como ‘Princesas e
cabaleiros ilustrados’, teatro, xogos e exhibicións, entre outros. En total preto de 25
actividades de balde para “promover a candidatura de Ferrol a Patrimonio Mundial da
man da cidadanía”, indicou a concelleira.
Chamada á cidadanía para asistir vestido de época
A concelleira fixo esta mañá unha chamada especial á cidadanía para que acuda ao
Festival vestida de época. De feito, algunhas das actividades programadas están
dirixidas especialmente aos veciños que se animen a ataviarse con roupa ou
complementos típicos do século XVIII. O aperitivo ilustrado con sesión musical que se
servirá o venres, ás 20 horas, o chocolate con churros do sábado e o baile ilustrado con
cóctel no Parador de Turismo da noite do sábado estarán abertos unicamente ás persoas
que asistan caracterizadas, un máximo de 200 por evento. Para animar á xente a
participar, no baile da máscara que se celebrará o venres a partir das 21 horas
entregaranse máscaras aos asistentes.
Varias das actividades programadas requiren inscrición previa, que debe facerse
exclusivamente a través de WhatsApp ou mensaxe escrito no número 660 152 563,
indicando a actividade e o nome completo do participante.
