Desde alcaldía - Saúda do alcalde

Son Jorge Suárez Fernández. Desde o 13 de xuño do 2015 son o alcalde de Ferrol porque así o decidiron os veciños e as veciñas cos seus votos e a ilusión de facer oír a súa voz na construción dunha democracia real nun novo Goberno municipal, no fondo e nas formas, que é transparente, participativo e que lle abre as portas da Alcaldía á veciñanza cada día, non só cada catro anos.

Non son un profesional da política. Son unha persoa do común que fai política para cambiar a súa cidade. O meu sitio está coa clase traballadora e a miña obriga é a de gobernar para todos e todas, convencido na defensa do social, do público e dos dereitos dos traballadores, coa firmeza inquebrantable na defensa dos intereses deste municipio e dos seus veciños.

Desde o Goberno local, teño e temos a encomenda de artellar solucións aos vosos problemas cotiáns e tende por certo que en ningún momento deste mandato esquecerei esa obriga nin eludirei a de responder por ela.

Contamos con vós para facermos, entre todos, a nosa cidade. A cidade que queremos e merecemos con forza e fraternidade, tecendo as redes de diálogo precisas na procura de solucións políticas consensuadas coa determinación de devolverlle ao noso Concello a estima necesaria e os medios para avanzar en xustiza e benestar social, nunha urbe viva, compacta, máis verde e peonil, ben comunicada, accesible para todos, dinámica no apoio ao pequeno comercio, ao emprendemento e á cultura local.

Conta connosco para abordar todas as iniciativas e proxectos que redunden no beneficio da nosa cidade dende a colaboración, con sensatez e na procura do ben común. 

JORGE SUÁREZ FERNÁNDEZ
JORGE SUÁREZ FERNÁNDEZ
Alcalde de Ferrol

2015 © Concello de Ferrol - Praza de Armas s/n - 15402 Ferrol
Teléfono: 981 944 000 - Email: informacion@ferrol.es - RSS
Versión en galego   Versión en castelán